Dapi igl onn 1996 habiteschel jeu cun mia famiglia a Trun. En Biblioteca Trun haiel gia spert anflau in liug da sesentir bein. Da lezzas uras era ella situada ellas localitads dalla Fabrica da ponn Truns. Sco visitadra haiel jeu pia era astgau persequitar il svilup e las differentas midadas da locals. Igl onn 2009 ei sedau per mei la pusseivladad d’astgar luvrar sezza en biblioteca. Bugen haiel surpiu quella sfida da saver far miu hobi tier mia lavur. Dapi igl avrel 2014 haiel astgau surprender la responsabladad sco menadra dalla Biblioteca Trun. Da luvrar cun cudischs ei adina puspei ina occupaziun plein tensiun ed era las lavurs administrativas ein per mei ina beinvesida variaziun.

Olivia Pfister
bibliotecara en la Biblioteca Trun dapi 2009
menadra dalla Biblioteca Trun dapi avrel 2014

Cun miu um e nos treis affons vivel jeu a Campliun che sauda cun Trun. Jeu hai gronda simpatia per cudischs e gia da buoba era il leger per mei zatgei dil pli bi. Aunc oz ei quei miu passatemps preferiu. Aschia ei igl astgar luvrar en biblioteca la cumbinaziun da duas caussas zun custeivlas per mei . La lavur ei varionta e las bialas sentupadas cun nossa clientella dattan a mi bia satisfacziun. Mia lectura preferida ein biografias e cudischs dil temps mediaval.


Esther Tomaschett
bibliotecara en la Biblioteca Trun dapi 2010

Leger ei per mei schon dapi biars onns ina pissiun. Saiel seprofundar en cudischs da tut geners. Mes favorits ein denton thrillers e romans. Bugen raquentel era cudischs a mes affons. Era sch’ei vegn adina puspei pretendiu ils medems.

Il dessert ei d‘astgar far gust als affons da prender in cudisch enta maun e fugir en in auter mund.
Cun la lavur en biblioteca saiel parter mia pissiun cun auters.


Iris Deplazes-Baselgia
bibliotecara en Biblioteca Trun dapi il matg 2016

Jeu habiteschel dapi igl onn 2000 cun mia famiglia a Trun. Jeu selegrel d’astgar luvrar en biblioteca. Quella lavur plai a mi e leger auda tier mes interess. Las uras da lavur en biblioteca ein idealas da cumbinar cun la situaziun familiara ed jeu vegnel ad emprender bia niev.


Rahel Lombriser
bibliotecara en Biblioteca Trun dapi il matg 2016

Erica Cavegn-Pfister
Caroline Demont-Albin
Claudio Scolieri
Wendelin Decurtins