Text: Roger Venzin / Mirco Wolf (2. sec.)

Dacuort ha Klaus-Peter Wolf prelegiu en biblioteca da Trun. Nies scolast da classa, Claudio Vincenz, ei ius alla staziun pil renomau scribent dalla Tiaratudestga. En biblioteca spitgavan las scolaras ed ils scolars dalla secunda e tiarza secundara sin la prelecziun digl autur.

Il vitg dils Indians
Klaus-Peter Wolf sesa sin meisa. El sepresenta ed entscheiva a raquintar da sia affonza. Cu Klaus-Peter era aunc pigns, ha el buca giu lev. Siu bab era in alcoholicher che vegneva spert en gretta. Adina cu siu bab greva entuorn, sezuppava Klaus-Peter davos ina plonta da gummi (Gummibaum) ch’el numna “in stumbel cun feglia”. Cu el sezuppava davos quella plonta, s’imaginava el ch’el seigi en in auter liug, numnadamein en in vitg dad Indians. Leu sesenteva el segirs da siu bab. Igl aschinumnau ’’Häuptling’’ schurmegiava el da siu bab stuorn. Sco Klaus-Peter Wolf ha detg, hagi el duvrau quei mund da fantasia per insumma surviver sco affon. Senza quella experientscha fussi el mai daventaus in scribent.

Humor ei la sligiaziun
Cun in bien ton humor ha Klaus-Peter Wolf gudignau l’attenziun dils scolars presents. Sco per exempel cun seser sin meisa e far curios moviments ni grimassas. Era sia terschola da varga 15 onns ha plaschiu a nus. E buca d’emblidar con bein ch’el ha prelegiu ses texts. El ha veramein tut in agen stil da preleger, sco da far teater.

’’Felix’’, aschia ha ina figura principala els cudischs da Wolf num. El emprova da dumignar ensemen puspei ses geniturs che han schau sparter. El mender cass drova Felix era manzegnas, savens cun success. Contas gadas schabegia ei ch’ina (pintga ni gronda) manzegna spendra la situziun…

Ei ha veramein fatg grond plascher da tedlar tier co Klaus-Peter Wolf ha prelegiu sin cudisch. Enzatgei ch’el ha aunc mai fatg ei stau da preleger ord in cudisch ch’ei aunc buca vegnius publicaus. Ei setractava dad in krimi. Wolf scriva era regularmein krimis per la televisiun, numnadamein pil „Tatort“. En tut ha el vendiu dapli che otg milliuns cudischs en varga 30 lungatgs.

Alla fin han tuts survegniu ina carta cun sia suttascripziun. Suenter, cu nus tuts mavan a gentar, eis el ius per in glatsch ch’el ha veramein meritau.

Ussa sa el scriver en tutta ruasseivladad vid siu niev krimi. Speronza vegn el spert a fin.